BANKARNIR RÝJA OKKUR

  Það, hvernig bakarnir raka saman milljarðatugum og hundruðum, segir okkur að þeir séu reknir af fullkominni fúlmennsku. Engin önnur atvinnugrein býr við svo takmarkalausa sjálftöku. Og ekki eru viðskiptavinirnir ofsælir af að halda bankakerfinu gangandi.

  Merkilegt er hvað þjóðfélagið er umburðarlynt við þessa kvalara sína. Varla að nokkur hósti né stynji, sama hversu kraminn er.

FRÉTTASTOFUR FÍFLAÐAR

  Skyndilega birtist Sigmundur Davíð Gunnlaugsson forsætisráðherra eins og jóltré um mitt sumar, umluktur kínverjum í álversham. Tveir herramenn undirrita viljayfirlýsingu um álver í landi Hafursstaða í Skagabyggð. Myndin er ekki tekin á staðnum, heldur í Ráðherrabústaðnum við Tjörnina í Reykjavík.

  Fréttastofurnar gleypa þetta hrátt. Í tvo sólarhringa voru sömu fréttirnar af þessu lesnar og skrifaðar. Auk þess að vita mest litið um málið var misfarið með hvar þessir Hafursstaðir eru. Sumir fjölmiðlarnir ef ekki fleiri en færri, nefndu Skagafjörð! Og grautuðu sveitarfélögunum á Norðurlandi vestra í eina kös.

  Eftir öll mín ár í fréttamennsku finnst mér það alltaf dapurlegt þegar kollegar mínir vita ekki um hvað þeir eru að fjalla. Í mínu kerfi ganga staðreyndir fram yfir hugmyndir. Að vita ekki hvar hvað er á landinu í nútíma netumhverfi er dauðasök fréttamanns!

  Hafursstaðir í Skagabyggð gjalda þess hugsanlega í þessu tilviki að Skagabyggð er nýlegt sveitarfélag, myndað úr tveim sveitarfélögum norðan og sunnan við Skagaströnd. Jörðin er örstutt frá Skagaströnd, nokkrum kílómetrum norðar en Blönduós. Auðgúggluð!

HUGMYNDANAUÐ

  Ég styð afstöðu Sigríðar Á. Andersen og rökstuðning hennar.

Ein gegn Jafnréttissjóði

Svanur S. Svansson er týndur

  Nýfæddur Svanur Svandísar- og Svansson, sonur álftaparsins þekkta á Bakkatjörn er týndur. Hann birtist á sundi með foreldrunum á sunnudaginn var, 31. maí. Síðast í gærmorgun sá ég parið með afkvæmið á einhverjum villigötum í sefi vestast í tjörninni, við bakkann. En síðan ekki söguna meir. Nú eru hjúin ein, en láta eins og ekkert hafi í skorist.

  Svo er ekki víst að unginn hafi verið karlkyns og hafi því í rauninni fæðst sem Svandís S. Svansdóttir. En það býttar engu. Unginn er týndur.

  Ég hef fylgst með fuglalífinu á og við Bakkatjörn og víðar við líkar aðstæður örugglega alla æfi Svandísar. Ekki sem sérstakur fuglaskoðari og án nokkurrar þekkingar á fuglategundum. Les mér til ef ástæður kalla eða hef samband við Náttúrustofu Kópavogs sem lítur eftir vötnunum kring um Reykjavík og fuglunum þar með. Það hefur ýmislegt drifið á dagana hjá frú Svandísi. Og ef nýjasti unginn er týndur, er það ekki í fyrsta sinn.

  Erindi mín eru að njóta náttúrunnar, sem ég móta í mínum römmum, kynna afkomendum mínum þetta nærlíf við fugla og fiska á meðan afkomendurnir eru nógu ungir til þess að gleypa við þessum áhuga mínum, og ennþá til í að gefa bíbí brauð eða veiða hornsíli eins og fuglarnir.

Hvar er ungi Svandísar?

ALÞINGI ER UNDUR VERALDAR

   Það er margt ef ekki flest sem er undarlegt við Alþingi. Núna er sent út frá þingfundum í Sjónvarpinu og á sjónvarpsrás þingsins en engu útvarpað. Sjónvarpsútsendingarnar eru tæknilega í ætt við Síðasta bæinn í dalnum. En leikurinn afleitur, enda er þingið óskipuleg kaos eins og það hefur verið áratugum saman.

  Mér þætti gaman að fá álit leikstjóra á uppsetningunni þar sem ræðumenn standa beint framan við forseta, hækka gólf ræðustólsins eða lækka eftir eigin hæð og svo má lengi telja. Þá fá þingmenn einkabloggræðutíma í hverri viku, á sjálfu Alþingi. Þar tala þeir hreint út í bláinn, enda enginn til svara!

  Ég sat á Alþingi sem þingfréttamaður DV eitt þing. Það var áður en þinginu var breytt úr þrem málstofum í eina. Bæði fyrr og síða hef ég fylgst þokkalega með í pólitíkinni. Hún hefur átt misjafna tíma, en af einhverjum ástæðum hefur skipulag þingstarfa og þinghaldið sjálft ekki náð að rífa sig upp á það plan sem nútíma stjórnunarhættir og almannarómur samþykkja.

 

JÓNAS ER FYRIRMYND!

   Bloggheimar eru í djúpum skít. Töluverð hjörð hefur í rauninni yfirtekið umræðuna á neikvæðum nótum, stóryrt og fordómafull. En það er ekki leiðum að líkjast, eða hvað? Jónas Kristjánsson fyrrum ritstjóri DV hefur ausið úr skálum sínum á www.jonas.is um árabil. Sérvitur, fordómafullur, stórorður og dómharður. Nánast allir sem honum líkar ekki við eru bófar og bófaflokkar.

  Hann skrifar yfirleitt þrjá níu línu pistla á bloggsíðu sína á dag, sem eru hlaðnir fordæmingum en fátækir af úrbótahugmyndum. Og er ekki til viðræðu við lesendur, þetta er boðskapur haleljúa. Af einhverjum ástæðum hefur þjóðin ekki almennt tekið mark á því sem Jónas hefur fært fram um áratugi, en það er talsvert. Þegar hann er nú loksins fullorðinn leggst hann í stríð við alla.

 

 

VIÐ GAMLINGJARNIR SVIKNIR

   Fyrir síðustu þingkosningar sendi Bjarni Ben. mér og öðrum gamlingjum í kjördæmi hans sérstakt bónorðsbréf. Ef þið kjósið mig og þar með flokkinn minn verða kjör ykkar leiðrétt svona og svona, í nokkrum tölusettum liðum. Nú komst Bjarni með flokkinn sinn í ríkisstjórn og þar með aðstöðu til þess að efna þessi fyrirheit frá því fyrir kosningar. En hann hefur heikst á því hvað varðar þá gamlingja sem eru eignalausir og hafa ekkert nema lífeyristekjur.

   Þegar mér fannst óhæfilegur tími liðinn án efnda, hafði ég tölvubréfasamband við blaðafulltrúa ríkisstjórnarinnar og í framhaldinu við Svanhildi Hólm aðstoðarmann Bjarna Ben. Ég var þá aðeins að spyrja hvað því liði að kosningaloforðin gagnvart mér yrðu efnd. Þetta var í nóvember 2013. Því er skemmst frá að segja, að skrifleg vilyrði Svanhildar um svör hafa ekki verið efnd enn þann dag í dag, þrátt fyrir áminningar!

   Tekjur mínar eru því þannig að ég fæ nánast nakinn ellilífeyri, greiðslur mínar í lífeyrissjóði eru hirtar eins og ég hafi aldrei borgað krónu í þá! Og hef engin svör frá Bjarna Ben. um hvenær og hvernig hann ætli að efna loforðin sem hann gaf mér fyrir síðustu kosningar. Það er aldeilis reisn yfir kappanum!

KALLINN Á KASSANUM Á ÚTVARPI SÖGU

   Kallinn á kassanum var predikari á Lækjartorgi. Eftirmaður hans er Pétur Gunnlaugsson á Útvarpi Sögu. Hann er stjórnarformaður og skilja má að hann sé líka sambýlismaður útvarpsstjórans, sem er eigandi stöðvarinnar. Nefndur Pétur er helsti þáttastjórnandi Sögu og lætur ekki deigan síga. Hann er skeleggur pólitíkus og veður elginn óspart um einkapólitík sína, svo að innhringjendur eiga iðulega ef ekki oftast fótum sínum fjör að launa, þegar Pétur er í stuði.

   Þar á móti eru aðrir innhringjendur, sem hafa flykkt sér um Sögudæmið og mæra það í bak og fyrir og eru auðvitað alltaf sammála Pétri.

HALLI THORST MÆTTUR AFTUR Á RÚV

   Það er sunnudagsmorgunn 19. apríl og ég er að hlusta á helgarvaktina á Rás2 með Hallgrím Thorsteinsson sem prímus mótor. Heimtan úr helju eftir að hafa tekið hliðarspor í ritstjórastól DV. Hallgrímur er sjálfur talandi útvarp og á þar heima, enginn skákar honum í því hlutverki.

NAKINN UNDIR ÚLPUNNI?

   Á myndinni er kappklæddur en ekki nakinn maður og tilbúin sjóspýja. Eða var ljósmyndarinn staddur þarna utan við varnargarðinn og náði þessari einu spýju upp úr lygnum sjónum?

Nakinn karlmaður á Sæbraut