SLEPPTI FLAKINU!

    Ég gagnrýndi fyrirhugaða veiðiferð Sigmundar Davíðs og Bjarna í Norðurá. Sölustjóri veiðileyfanna kynnti þá félaga til veiða frá opnun fram á miðjan næsta dag, sem sagt að þeir hefðu þegið boð í veglega veiðiferð í Norðurá.

    Fleiri gagnrýndu þessa ósvinnu. Næst gerist það hægt og hægt að þessi veiðiferð er orðin að viðveru við opnun árinnar milli sjö og átta eða svo, til þess að styðja veiðibændur við að selja veiðileyfin. Sem voru nær uppseld!

   Þar næst brestur á sýning í sjónvarpsfréttum, Bjarna dugði korter, en Sigmundur Davíð sýndi enga takta og varð ekki var. Vonbrigði hans voru mikil þegar Bjarni sleppti feng þeirra og þar með báðum flökunum!

    Annars snýst þessi uppákoma ekkert um lax eða afsakanir. Báðir þeir Sigmundur og Bjarni lýstu undrun sinni á gagnrýni á ferðalag þeirra, sem var upphaflega þetta og endanlega hitt. Það skortir á sjálfsvirðingu.