HVAÐ VAR Í STAÐINN FYRIR KJÖTIÐ?

  Nú er búið að dæma tiltekið bökufyrirtæki úr leik. Það átti að vera 30% nautakjöt (líklega réttar nefnt nautgripakjöt) í hverri böku. En það reyndist ekkert kjöt vera í bökunum. Enginn upplýsir hvað var í staðinn í bökunum!

  Alltaf jafn fyndið að sjá og heyra Jóhannes Gunnarsson formann Neytendasamtakanna leggja dóm á tilfellið. Honum hefur tekist að halda sinni formennsku án þess nokkurn tíma að hafa skipt nokkru máli! 

  Og hvað var svo í bökunum sem átti að vera nautakjöt en var ekki einu sinni kjöt? Hvað höfum við neytendur verið að éta brúnleitt í bökunum Jóhannes, Jóhannes ...?

SJÁLFSTÆÐISFLOKKURINN MEÐ HIKSTA

  Það fór þannig eins og stefndi í á Landsfundi Sjálfstæðisflokksins, að Bjarni var endurkosinn formaður. Af því að hann braut ekki odd af oflæti sínu með því að stíga til hliðar í þágu flokksins og þjóðarinnar. Hann átti þess kost að efna til stórsigurs sjálfstæðisstefnunnar, en heyktist á því.

  Þetta er bara sorglegt. Glatað tækifæri á ögurstundu. Ég samhryggist með frágengnum formanni Sjálfstæðisfélags Álftaness. Við eigum samleið ...

AFNEITUN BJARNA BEN

  Núverandi formaður Sjálfstæðisflokksins sagði itrekað fyrir helgina og landsfund flokksins, að hann ætlaði ekki að láta hrekja sig frá formennskunni. Bjarni Benediktsson er því miður ekki í miklum metum hjá kjósendum, ekki einu sinni í eigin flokki. Það er sama hversu ósanngjarnt honum finnst það að vera bendlaður við ófarir í fjármálum, hann hefur ekki verið á tánum að skýra sína hlið og farist óhönduglega hafi hann reynt það.

  Svo hélt hann þessa vonbrigðaræðu við setningu landsfundarins núna, með því að leggja flokksliðinu línurnar frá a til ö, tilkynna allar helstu áherslur fundarins fyrirfram. Þetta er gamla sagan í Sjálfstæðisflokknum, að forystan ræður sínum ráðum og tilkynnir landsfundi hvað hann eigi að blessa. Villist menn út af línunni og nái jafnvel að fá samþykktar breytingar eða ályktanir sem forystan er ósátt við, gerir hún ekkert með slíkt!

  Ég tala af reynslu og þekkingu til meira en hálfrar aldar. Bjarni er ekki að höndla hlutverk sitt sem formaður Sjálfstæðisflokksins. Núna er hann að gæta eigin metnaðar á kostnað flokksins og þjóðarinnar. Það er augljóst.